بمناسبة يوم الصحة العالمي، وضمن البرنامج الوطني للتحصين التابع لوزارة الصحة، نظّمت هيئة الخدمات الطبيّة للإسعاف والإغاثة، بالتعاون مع الصليب الأحمر اللبناني وبدعم من اليونيسف، حملة تلقيح مجانية للأطفال، كانت فعلاً نهار مميز وبيشرف.
من الساعة 10 الصبح، بلّشت الخيمة يلي نُصبت بـ قصقص مقابل مسجد الخاشقجي – بخيمة رابطة أبناء بيروت، تستقبل الأطفال مع أهاليهم، والكل كان جاهز بخدمة الناس، من الممرضين للمشرفين وحتى المتطوّعين.
الحملة كانت منظمة بطريقة كتير محترفة:
في نقطة استقبال ليتأكدوا من دفتر اللقاح ويحددوا شو ناقص.
في فرق مختصة عم تقوم بعملية التلقيح بكل عناية واهتمام.
كل شي كان عم يمشي بسلاسة وبجو من التعاون والمحبة.
اللقاحات يلي توفرت كانت شاملة وبتغطي كل شي لازم حسب رزنامة وزارة الصحة: صفيرة B، شلل (فموي وعضلي)، خماسي، مكورات رؤوية، حصبة، الثلاثي، الثنائي، الروتا وغيرهم… والجميل إنو الأهالي كانوا كتير مرتاحين ومتجاوبين.
واللافت كمان إنو في توعية كانت عم تنعطى للأهالي عن أهمية كل لقاح، وكيف بيحمي ولادن من أمراض خطيرة بالمستقبل.
هيدا النشاط بيأكد إنو الصحة مسؤولية جماعية، وإنو كل جهة، من الدولة للمجتمع المدني، عم تشتغل بإيد وحدة لحتى نضمن صحة وسلامة ولادنا.
شكراً لكل حدا ساهم بهيدا النهار… واللقاح حق كل طفل، مش رفاهية!
